Яна очиқлик кераклиги ҳақида. Солиқ тўловчилар ҳисобидан компенсацияланаётган фоизлар ва кафилликлар тўғрисидаги маълумотлар очиқланиши лозим Ўтган замонда ажратилаётган кредитларнинг ярмидан кўпи имтиёзли фоизларда молиялаштирилар эди. Турли диспропорцияларни яратадиган, кредит маблағларига имконни коррупцион каналларини яратадиган бу йўлдан секин-аста воз кечилмоқда. Шу мақсад йўлида Тадбиркорлик фаолиятини қўллаб-қувватлаш давлат жамғармаси ташкил этилган. Жамғарма бозор ставкаларида ажратилган кредитлар фоиз харажатларининг бир қисмини қоплаб беради, шунингдек кредитлар учун кафилликлар тақдим этади. Жамғарма ташкил этилганидан буён ўтган даврда компенсация ва кафиллик тақдим этилмайдиган соҳанинг ўзи қолмади, яъни фоизлари қопланаётган ва кафилликларлар берилаётган кредитлар ҳажми борган сари кўпаймоқда, табиийки бу бўйича харажатлар ҳам ортмоқда. Харажатларнинг энг катта қисми давлат бюджети ҳисбидан, яъни тўлови бизнинг, солиқ тўловчиларнин гарданига тушади. Лекин мана учинчи йил кетмоқдаки, жамғарма ўз фаолияти ва унинг натижалари бўйича бирон бир платформада очиқ маълумотларни эълон қилмаган. Агар адашмасам, жамғарманинг ҳатто сайти ҳам йўқ. Ўзбекистон солиқ тўловчилари уларнинг ҳисобидан қопланаётган кредит ва фоизлар тўғрисида батафсил, очиқ ва шаффоф маълумотларни олишга, ўрганишга ҳақли, нима дейсизлар? Менимча ҳақли! Дарвоқе, яқинда эълон қилинган "Очиқлик декрети"да турли кўриниш ва мақсадларда ташкил этилган давлат жамғармаларига нисбатан очиқлик ва ҳисобдорлик талаблари негадир киритилмаган. P.S. Жамғарманинг сайти мавжуд экан. Лекин унга тармоқлар, тижорат банклари, ҳудудлар қирқимида компенсациялаланаётган фоизлар, тақдим этилаётган кафилликлар ҳажми, молиявий натижалар, активлар ва мажбуриятлар ҳақида ҳеч қандай маълумот киритилмаган. @the_bakiroo