«Вакцина олиб яшаш вакцинасиз яшашдан кўра анча хавфсиз деган аниқ қарорга келдим», -- деб ёзибди бугун, 31 июль куни Комил Алламжонов. «Ўлсам ҳам вакцина олмайман» деган баъзи одамлар ҳам, айтишларича, айнан бугун, 31 июль куни вакцина олибди. Бундай гаплар, бундай хатти-ҳаракатлар АҚШ Ўзбекистонга совға қилган 3 миллион дона «Модерна» вакцинаси айнан бугун, 31 июль куни тақсимланиб, поликлиникаларда қўлланила бошлагач айтилгани, қилингани четдан сал-пал ғалати кўринади, албатта. Ҳа-я, «ўлса ҳам вакцина олмоқчи бўлмаган» айрим ватандошларимиз «Модерна» билан эмланибди. Четдан сал-пал ғалати кўринади дедиму, лекин бунақа пичингларга парво қилмаслик керак -- нима бўлишидан, ким нима дейишидан, қандай киноя-ю кесатиқлар янграшидан қатъи назар, вакцина олиш керак. Ҳақиқат шуки, ҳар ким ўзи хоҳлаган, ўзи ишонган ва ўзи яхшироқ деб ҳисоблаган вакцинани олишга ҳақли, қолган гаплар «копейка». Лекин, шу ўринда, масалан, коронавирусга қарши вакцинация масаласида ғўза генетикларининг ҳар қандай ваъда-ю даъволарини, менимча, йўққа чиқарувчи бир-икки хулоса бор. Биринчи хулоса шуки (бу хулоса унчалик ҳам янгилик эмас аслида), халқ давлатга ишонмайди. Афсуски. Бирор ўзбек сиёсатчисининг омма олдига чиқиб «мен ўзбек-хитой вакцинаси билан эмландим» деган гапидан кўра кўп ўтмай унинг ҳамкасблари томонидан орқаваротдан тарқатилган «аслида Спутник олибди» деган миш-миш ишончлироқ; бирор ўзбек юлдузининг «мен ҳам эмландим» деган ҳештегни кўтариб тушган суратидан кўра унинг саноатдошлари томонидан айтилган «шунчаки пропаганда учун суратга тушиб берибди, аслида Америка вакцинасини кутишаётганмиш» деган гаплар ишончлироқ. Тошкент ҳокими ўзбек-хитой вакцинаси билан ростдан эмланишини видео қилиб кўрсатса ҳам ишонмади-ку одамлар, яна қанақа мисол керак ўзи? Иккинчи хулоса шуки, Путин дунё устуни («шунинг учун ҳам биринчи вакцина Россияда чиқди-да, ока»), Си Цзиньпин бошлиқ Хитой бўлмаса Америка ҳаддидан ошиб кетиши мумкин («коронавирусни аслида Америка Хитойни синдириш учун ўйлаб топган, ока»), лекин... лекин «инсониятни қириш учун коронавирусни ўйлаб чиқарган», «вакцина орқали одамларга чип ўрнатиб, уларни 5G антенналарига айлантириш ниятида бўлган» Билл Гейтс яшайдиган Американинг вакцинаси (чет эл хўрозқандининг энг зўри!) яхши-да барибир. Мана, «ўлса ҳам вакцина олмайдиган» одамлар «Модерна» тарқатилишининг биринчи куниёқ бориб вакцина олибди-ку (оладиям-да, ахир бу вакцина ҳаммуаллифлари на ғўза генетиклари, на ФСБ генераллари). Яна қайтараман -- сиз бу киноя-кесатиқларга эътибор берманг, асло, устингиздан хахолаб кулишаётган бўлса ҳам вакцина олиш керак. Учинчи хулоса шуки, агар давлат ҳақиқатан ҳам мамлакат аҳолиси коронавирусга қарши (тўлиқ) эмланишини истаётган бўлса, у ҳолда «ўзбек-хитой вакцинаси» деган бечораҳол томошани йиғиштириши, «Спутник»дан ҳам умидвор бўлмаслиги керак («Спутник» россияликларнинг ўзига етмаяпти, Россия Ўзбекистондан кўра оғирроқ тош босадиган Аргентина ва Бразилия каби ҳамкорлар олдида мажбуриятларини бажара олмаяпти, масалан). Бир-икки йилга бўлса-да метро, аэропортлар қурилиши, миллиард-миллиард сўмларга ҳайкаллар ўрнатиш, ўзи шундоқ ҳам обод зиёратгоҳларни миллиардлар эвазига қайтадан қуриш ва ҳоказо ортиқча, ҳозирча ўринсиз ҳам бефойда харажатларни тўхтатиб, бирламчи эҳтиёжлар (масалан, энергетика)дан ташқари барча ортиқча маблағларни дунё тан олган вакциналар («Пфайзер», «Модерна», «АстраЗенека» ва ҳоказолар)ни сотиб олишга йўналтириш керак -- халқ ишончини сал-пал бўлса-да қозониш ва халққа ҳақиқатан ҳам чин хизмат қилиш учун яхши бир имкон бўларди бу давлат учун. Шунда, катта эҳтимол билан, аҳолини эмланишга мажбурлайдиган (ва кўпчиликнинг назаридаги инсон ҳуқуқларига зид) қонун(лар)ни қабул қилишга ҳам ҳожат қолмасди. Ўз навбатида, бизнинг «ҳали ёш, мустақил бўлганига эндигина 30 йил тўлган» давлатимиз ўрнига эмланиш учун стимулларни бошқалар топиб бераверади -- масалан, кеча «вакцина олмайман, лекин Модерна бўлса оламан, чунки Модерна олиб, Умрага борса бўларкан», деган ҳамкасбимга Саудия Арабистони стимул топиб бергани каби.