Аввал бошқа вакцинанинг дастлабки дозасини олиб, кейин бошқа турдаги вакцинани олишга уринишлар ҳақида Вакцинациялаш масканларида фаолият юритаётган ҳамшира ва шифокорларнинг айтишларича, аввал ZF-UZVAC-2001 вакцинасининг 1- ё 2- дозасини олган юртдошларимиз хорижий паспортни тақдим этган ҳолда Moderna вакцинасини олишга уриниб кўрмоқдалар экан. Маълум бўлишича, вакциналашдан аввал шахснинг маълумотларини базадан текшириб кўрилса, бунинг амалда иложи йўқ. Чунки вакциналанганлик тўғрисидаги маълумотлар базаси идентификатор - ЖШШИР (ПИНФЛ)га боғланган. Фуқаролик паспорти ҳам, ID карта ҳам, хорижга чиқиш паспорти ҳам ЖШШИР (ПИНФЛ) билан узвийлашган. Аввал бошқа вакцинанинг дастлабки дозасини олганлар ўзаро келишув билан ёки маълумотларни базадан текширилмай туриб бошқа турдаги вакцинани олишга уринишлари муваффақиятли чиққан тақдирда ҳам маълумотлар базасида эмланганлик тўғрисидаги сертификат шаклланмайди. Шундай экан, маълум турдаги вакцинани олдингизми ўша турдаги вакцинанинг барча дозаларини тўлиқ олишга ҳаракат қилинг. Тизимни алдашга уринманг. Бу соғлиғингизга ҳам зиён етказиши мумкин.