Чорва учун имтиёзли кредит бериш оқибатлари: Бу ўзини қанчалик оқлади? Шуҳрат Шокиржонов тизим иштирокчиларининг ҳаммаси норози бўлган имтиёзли кредитлаш ҳақида катта мақола тайёрлапти. Айрим тезислар: Вазият шундайки, кредит олган фуқаролар унинг суғуртаси учун тўловни қилишмаяпти. Аксарияти, умуман, кредитни банкка қайтаришни ўйлашмайди ҳам. Пул ундириш учун борган банкирларга қарата: «Молни менга президент берган, қаерга борсанг бор», деб молни аллақачон бозорга чиқариб сотиб юбориб, пулини ўз эҳтиёжларига ишлатиб юбормоқда. Четдан холис нигоҳ билан қараганда вазият имкон қадар бир-биридан кўпроқ юлиб қолишга ўхшамоқда. Ҳамма жабр кўрмоқда: аҳоли ҳам, банк ҳам, таъминотчи ҳам. Фақат илоннинг ёғини ялаган айрим учарлардан ташқари. Имтиёзли кредитлаш — у қандай мақсадлардан эълон қилингани ва сиёсий самимият мавжудлигидан қатъи назар, фақат ўртакаш даллоллар ҳамда чайқовчилар манфаатларига хизмат қилади. Ҳозирги оилавий тадбиркорликни кредитлаш тизимидан ҳамма дод деяпти: банклар ҳам, кам таъминланганлар ҳам, таъминотчи корхоналар ҳам. Кам таъминланганларга имтиёзли кредит ажратишнинг 4 йиллик тажрибаси кутилган натижани бердими? Ўтган даврда 300 мингдан ортиқ кам таъминланган дейилган фуқароларга мана шундай кредитлар ажратилди. Шулардан қанчаси ўртаҳолга айланди, кимдир буни ҳисоблаяптими?