Ўзбекча ижро: Ясама кўприқ қурган жазоланди. Яхши. Лекин кўприк қачон битади? Булоқбоши ва Марҳамат туманларини бирлаштириб турадиган Кулладаги Аравонсойдан ўтадиган кўприкни деярли ҳар йили сув ювиб кетади ва кўприк яроқсиз ҳолатга келади. Кўприк қайта ва қайта таъмирланади, лекин келаси йили яна шу ҳолат такрорланаверади. Охирги марта шу йил ёзда кўприкни сув ювиб кетган. Шунгаям уч ой бўлди. Лекин ҳали кўприк таъмирлангани йўқ. Марҳаматдан Булоқбошига бориш учун кўприкдан ўтилмаса, айлана йўллар билан ўнлаб километр ортиқча йўл босиб ўтишга тўғри келади. Кўприк йўқлиги учун айрим фуқаролар сой устидан ёғоч ташлаб бошқа фуқароларни тўлов асосида ўтказиб қўйишни йўлга қўйипти. Албатта бу хафвли. Эҳтимолий ёмон оқибатларнинг олди олиниши керак ва зарур. Булоқбоши туман ҳокимияти ясама кўприк қуриб пул ишлаётган фцқаро ушлангани ва жазолангани ҳақида рапорт берипти. Лекин кўприк қачон таъмирдан чиқиши ва бу борада нимадир ҳаракат қилинаётгани ҳақида бирон сўз йўқ. Олдинда эса қиш турипти. P.S. Ҳокимиятга кўра, гўёки иш шу билан битди. Айбдор топилди ва жазоланди. Ўша сойдан одамлар ҳаётини хавф остига қўйиб ўтишда давом этаётгани ва бундан бошқа чора қолдирилмагани ўзбек чиновникларини асло қизиқтирмайди.