Битта Ли Куан Юга юзта Мугабе тўғри келиши ҳақида Автократия ва яккаҳокимлик тарафдорлари унинг самарадорлиги ҳақида сўз очганида, Ли Куан Ю мисолини дарҳол ёдга олишади. Лекин уларга ҳар доим Ли Куан Ю муваффақиятига асос бўлган ўнлаб омилларни ёдда тутган ҳолда ўтган ва янги асрда битта Ли Куан Ю мисолига юзлаб Мугабелар тўғри келишини эслатмаса бўлмайди. Ҳокимлар мисолида ҳам шундай. 30 йилдан буён умумқабул қилинган штамплар билан яшаймиз. Лотореяга ютуқ кутгандек, яхши ҳоким келишини кутамиз. "Кетган ҳоким ёмон, эплолмади. Гуллатиб юборса бўларди. Янгиси яхши, мана энди ҳаммаси зўр бўлиб кетади". Лекин орадан кўп ўтмай ҳаммаси яна аввалгидек такрорланаверади. Ҳатто шу кунимизда ҳам яхши, сифатли ҳокимлар мавжудлигини инкор этмайман. Бор шундайлар, лекин улар қоида эмас, қоидага терс тарзда мавжуд. Ҳокимнинг сифати унинг шахсий сифати билан бирга уни тийиб туриш ва ваколатларини чеклаш тизимларига чамбарчас боғлиқлигини ҳалигача кўра олмаяпмиз. Шундай экан, мана энди навбатдагиси ҳам "Мугабе" бўлиб чиқмаслигига умид қилишда давом этаверамиз.