Калит ибора - "узоқ муддат бошқарган" Юксалиш "узоқ муддат бошқарган лидер -реформаторлар" рўйхатини тузиб, инфографикага жойлагани тармоқ фойдаланувчиларида қатор мулоҳазаларни яратаяпти. Муҳрим масалан, "Салазар ва Пак Чон Хига жой топилган жойда нега Тито ва Пиночет йўқлигидан ҳайрон". Ботир Қобилов эса диктатор Салазарнинг қанақа "реформатор" бўлгани ҳақида бир шингил ҳикоя билан бўлишмоқда. Дарвоқе, Салазарнинг ўлиши ва тирилиши воқелиги "Гуд бай, Ленин" фильми учун хамиртуруш бўлган бўлиши ҳам мумкин. Сюжет айнан ўзгинаси. Нима демоқчиман? Бу рўйхатдан асло ҳайрон бўлмаслик керак. Бу ерда умумий маҳраж реформаторлик эмас - закийлар тушунади. Умумий махраж - "узоқ муддат бошқариш" ва гўёки бунинг норма эканини таъкидлаш. Пак Чон Хи, Салазар каби ҳокимиятни куч ва манипуляция билан эгаллаб келганлар қаторида Рузвельт, Меркел, Тэтчер каби даврий, эркин ва рақобатли сайловлар орқали ҳокимиятда бўлганларнинг қўшилиши бу пропаганда учун майда деталлар. Масалан, Кремль пропагандаси Путиннинг узоқ муддат ҳокимиятда қолишини оқлаш учун доим Меркел мисолини келтиришади. Лекин Меркел 16 йил давомида 5та эркин сайловдан ўтгани ва унинг раҳбарлигидан барча ҳукуматлар коалицион ҳукумат бўлгани ҳақида ёки Салазар, Пак Чон Хига ўхшаб мухолифларини ўлдиртирмагани ва турмада чириттирмагани борасида сукут сақлаб қўйилаверади. Чунки бу кенг истеъмолчига, савол бермайдиган тоифага мўлжалланган. Нима бўлгандаям эсдан чиқармаслик лозим бўлган, йиллар, асрлар, тузумлар тасдиқлаган ҳақиқат бор: Ҳокимият бузади, чекланмаган ҳокимият эса чексиз бузади.