«Бугунги Тошкент 1994 йилги Дубайдан зўр. Аниқ!», деяптилар ҳокимбува. Бу туризмга бағишланган тадбирда айтилган гап. Дарҳақиқат, туризм масаласида бугунги Тошкент нафақат 1994 йилги Дубайдан, балки 1994 йилги Тошкентдан ҳам зўр. Йўқ, адашдим — бугунги Тошкент туристлар эркин, бемалол ва арзон ҳаракатлана олиши масаласида 1994 йилги Дубайдан зўр бўлиши мумкин, лекин 1994 йилги Тошкентдан зўр эмас, манимча. 1994 йилги Тошкентда такси, автобус ва метродан ташқари трамвай ва троллейбус ҳам бўлган, шаҳарнинг жамоат транспорти етиб бормаган қисми деярли бўлмаган, интерваллар ҳозиргидан қисқа бўлган ва ҳоказо, ва ҳоказо. Бундан ташқари, чанг камроқ, соя кўпроқ, парклар дарахтларга тўла, қуюқроқ бўлган, шаҳар ичида бир эмас, бир неча пляжлар бўлган. 1994 йили Дубайда пляжлар бўлмаган бўлиши мумкин, лекин Тошкентда бўлган.