Урушдан кейинги оқибатлар прогнозлари Россиянинг НАТО ва Ғарб олдига қўйган ультиматумлари бўйича музокаралар боши берк кўчага кириб қолгач, Украинага ҳужум ва унинг оқибатлари келтириб чиқарадиган иқтисодий прогнозлар янграй бошлади. Очиғи, Ғарб истеблишменти Украинага ҳужумни олдини олишга жиддий ҳаракат қилаётгани йўқ, фақат агрессия юз берадиган тақдирда Россияга қарши қўлланиладиган оқибатлар ҳақида огоҳлантирмоқда холос. Агар классик адабиётдан қиёс олсак, воқеаларнинг ривожи Маркеснинг "Ошкора қотиллик қиссаси"ни эслатади. Қиссада қотилликка ошкора, намойишкорона тайёргарлик кўрилади, у ҳамманинг кўз ўнгида содир бўлади. Ҳамма билади ким қурбон, ким қотил бўлишини. Ҳеч ким бўлажак қурбонни қутқаришга шошилмайди. Аввало айтиш керакки, Ғарбни Украина ва қадриятлар эмас, нефть нархи кўпроқ ташвишга солмоқда. Агар ҳужум амалга ошса, бир неча кун ичида нефть таклифи қисқаради ва котировкалар 150 долларгача етиши мумкин. Нефть нархининг кескин кўтарилиши тикланаётган иқтисодий ўсишни яна секинлаштиради ва ҳатто манфий кўрсаткичгача туширади. 2021 йилдаги инфляция рекордлари янги максимумларгача кўтарилади. Россияга қарши қўлланиладиган санкциялар фонд бозорларида мисли кўрилмаган стресслар яратади. Глобал капиталнинг ривожланаётган давлатлардан хавфсиз ҳудудга - АҚШга кўчиши янада тезлашади. Учинчи эшелондаги давлатларнинг валюталари энг кўп жавр кўради.