Ўртача ойлик иш ҳақи 3,2 млн.сўмга етган. Лекин аслида бундан анча кам 2021 йил якунларига кўра Республика бўйича ўртача ойлик иш ҳақи 20 фоизга ўсиб, 3,2 млн.сўмга етгани очиқланди. Лекин амалда ўртача ойлик иш ҳақида бундан анча паст. Чунки бу сафар ҳам ойлик иш ҳақи жуда паст бўлган қишлоқ хўжалиги ва кичик бизнес субъектлари бўйича кўрсаткичлар умумий статистикада акс этмаган. Масалан, 2020 йил яккунлари бўйича ўртача иш ҳақи 2 667,6 минг сўм дея эълон қилинган. Амалда эса, барча субъектларни, хусусан ойлиги паст бўлган қишлоқ хўжалиги ва кичик бизнесни инобатга олганда ўртача ойлик 16,7 фоизга пастроқ - 2227,1 минг сўмни ташкил этган холос. Умид шуки, Статистика қўмитаси ўрта ойлик иш ҳақи бўйича реал кўрсаткичларни қайтадан эълон қилади. Энди, эълон қилинган рақамларга келсак, таълим ва соғлиқни сақлаш соҳасида маошлар ўртача республика кўрсаткичидан ортда қолишда давом этмоқда. Шунча кўп ваъдаларга қарамай таълимда ўртача маошлар республика кўрсаткичининг 72,1%ини, соғлиқни сақлашда эса 67,2%ини ташкил этган. Ўтган йили бу кўрсаткичлар бироз юқорироқ, мос равишда 74,2% ва 67,8% эди. Энг катта маошлар Тошкент шаҳрида - 4,9 млн.сўм. Энг кам маош эса Наманган вилоятида - 2,4 млн.сўм. Айтиш керакки, ҳудудлар қирқимида ҳам тенгсизлик борган сари кучайиб бормоқда. Масалан, Тошкент шаҳри ва Наманган вилояти ўртасидаги фарқ 2020 йилда 1,94 баробар бўлган бўлса, 2021 йилда фарқ 2,06 баробарга етган. Агар бу ҳисобга вилоятларда вазни юқори бўлган қишлоқ хўжалиги ва кичик бизнес улушини қўшсак, фарқ янада юқори эканинини кўриш мумкин бўлади.