Энг кўп маош молиячи ва банкирларда, энг ками эса ўқитувчи ва шифокорларда. Лекин муаммо бунда эмас! Расмийлар 2021 йилнинг ўтган ойларида ўртача ойлик иш ҳақи тўғрисидаги маълумотларни эълон қилишди. Доимгидек ўртача ойлик иш ҳақи ҳисобида кичик тадбиркорлик субъектлари ва қишлоқ хўжалиги соҳаси инобатга олинмаган. Агар бу сегментлар инобатга олинганида, ўртача ойлик иш ҳақлари анча пастроқ кўриниш олган бўларди. Кимга қизиқ бўлса, бу ҳақда илгари ҳам тўхталганмиз. Ўҳ-ҳў деворманг. Хуллас, ўзбекча ўлчовларда ўртача иш ҳақи 2 971,1 минг сўмга етган. Бу ўтган йилнинг шу даврига нисбатан 16,3 фоизга кўп дегани. Ўтган даврда маошлар ошишининг энг катта суръати Тошкент шаҳрида қайд этилган - 24,5%. Албатта статистикани кўрганлар бу "муттаҳам молиячи ва банкирлар" намунча кўп маош олишади, деган фикрга келишлари табиий. Олдинга ўтиб айтиш керакки, муаммо молиячи ва банкирларнинг маоши нисбатан юқоридалигида эмас, ўқитувчи ва шифокорларнинг маоши ўта пастлигида. Агар шу суръат сақланса, яна 18-19 йиллардан кейин ўқитувчи ва шифокорларнинг ўртача маоши ваъда қилинган 1000 долларга етиши мумкин. Кимнидир қалбига озор етказган бўлсам, узр. Саволни менга эмас, бюджет тақсимловчиларга берган маъқулроқ. Демак, масала банкир ва молиячиларнинг маошини суннат қилишда эмас. Зеро, агар солиштирилса, улар ҳатто қўшни давлатлардаги ҳамкасбларидан анчагина қашшоқроқ. Тўғри, ўқитувчи ва шифокорлар кўпроқ, банкир ва молиячилар камроқ қашшоқроқ. Дарвоқе, кўп бора таъкидлаганимиздек, ҳудудлар қирқимида олганда банкир ва молиячиларнинг маошлари ўта кескин фарқланади. Масалан, сурхондарёлик банкир/молиячи тошкентлик ҳамкасбидан 2 баробар камроқ маош олади ва умуман вилоятлар миқёсида олганда банкир/молиячиларнинг маошлари бошқа соҳа вакилларининг маошларидан катта фарқ қилмайди. Вилоятлар қирқимида қаралса, энг кам маошлар Наманган вилоятида, энг юқориси эса Тошкент шаҳри ва Навоий вилоятида экани ойдинлашади. Якунда агар бойимоқчи бўлсангиз, ёлланма ишчи бўлишни эмас, бизнесни, рискка боришни, яъни тадбиркорликни танлаш лозимлигини эслатиб ўтишга тўғри келади. @the_bakiroo