Мўйловли вассал мунозара субъекти эмас "Ҳурматли Александр Григорьевич, аввало, ўз мамлакатининг ички ва ташқи масалалари билан шуғулланса оқилона йўл тутган бўлар эди. Зотан, бугунги кунда Беларусдаги муаммолар “яшириб” қўйилгани билан, буткул бартараф этилмаган". Давлетовўзнинг манбаси Лукашенконинг навбатдаги алжирашларига шу тарзда муносабатда бўлишни маъқул кўрган. Умуман олганда тўғри позиция. Айни пайтда бугунги Кремль билан муносабатларда чақириқларга гибрид жавоблар асосий ўринга чиққанини, сигналларга сигналлар билан жавоб бериш муҳимлигини инобатга олмасдан бўлмайди. Масалан, Европа ва Байден етовидаги Қўшма штатларнинг Россияга муносабатлари аввалбошдан ютқизиққа маҳкум. Оғзидан техник спирт анқаётган шпана оқшом пайти театрдан қайтаётган зиёли бўғзига пичоқ тираса, у билан дипломатияга киришиб бўладими? Ўзи шпана учун қонун борми? Кел, қонун бўйича гаплашайлик, келишиб олайлик, сенинг ҳаракатларинг жиноий дейилса, шпана инсофга кирадими? Йўқ, албатта. Шпана кимга рўпара келганини тушуниши учун у биринчи ҳаракатдаёқ биқинига ё башарасига зарба олиши керак. Шундагина у кимга рўпара бўлганини тушунади ва музокараларга тайёр бўлади. Ҳа, илдамлик қилинмаса, шпана бўғизга пичоқ тортиб юбориши ҳеч гап эмас, лекин мутаносиб жавоб берилмаса, барибир бир муддат ўтиб бўғизга пичоқ тортилади. Шу маънода масалан, Эрдоганнинг Путин Россиясига нисбатан сиёсати энг тўғри позиция ўлароқ кўринади. Мен Эрдоганнинг мухлиси эмасман. Лекин Эрдоган Сурияда бўладими, Ливиядами, ё Путин ўзининг томорқаси ҳисоблайдиган Қорабоғдами, ўзини Путиндан кўра батаринроқ тута олади. Путин ўзи баҳолаб бўлмайдиган шахс, Путин Россияси кейинги ҳаракати нимадан иборат бўлишини прогноз қилиб бўлмайди. Лекин Эрдоган ва бугунги Туркия ундан ҳам ўтиб туша олади. Айнан мана шундай позиция Путин Россияси ва унинг қўғирчоқ вассалларига нисбатан асосий рецептга айланиши керак. Раҳматли Каримовнинг 2008-2016 йиллардаги ташқи сиёсат прагматикаси айнан шунга асосланганди. Кремль ва унинг Жириновскийдан тортиб Рогозингача бўлган лайчалари, Комсомольская правдадан Соловьев-у, Киселевгача тушунишардики, Каримовнинг ғашига тегмаслик керак. Чунки у унга етказилмоқчи бўлган зарардан кўра ортиқроқ зарар бера оларди.