Сўм январь ойида ҳам мустаҳкамланишда давом этди 2022 йилнинг январь ойида сўмнинг реал алмашув курси 0,8%га мустаҳкамланган. Сўм реал эффектив қийматининг ошишига ҳамкор давлатларда валюта курсларининг қадрсизланиши асосий омил бўлган. Маълумот учун, расмий курс инобатга олинса, 2022 йил январь ойи давомида сўм долларга нисбатан 0,21%га, еврога нисбатан 1,51%га, рублга нисбатан 5,64%га, қозоқ тенгесига нисбатан эса 0,04%га мустаҳкамланган. Регулятор сўмнинг реал эффектив алмашув курсини 2018 йил июндан буён мониторинг қилиб бормоқда (ўшанда сўм очиқ конвертация даврида энг юқори мустаҳкамланиш нуқтасига етган эди). Демак, 2018 йил июнидан бошлаб ҳисоблаганда сўмнинг эффектив алмашув курси 6,3%га, ўтган йилнинг шу даврига нисбатан эса 5,4%га мустаҳкамланган.