​Автомобиль саноатини Ўзбекистон сингари узоқ йиллар ҳимоя қилган давлат яна борми? Бор шундай давлат. Бу Россия. Россия Совет иттифоқидан қолган автомобиль саноатини ташқи рақобатдан 20 йилдан ортиқ муддат давомида ҳимоя қилиб келган. Лекин бу йўлда ҳеч қандай муваффақиятга эришмаган. Қайтанга 20 йил давомида Москвич ишлаб чиқаришни бутунлай тўхтатган бўлса, ГАЗ каби тарихан гигант концерн енгил автомобиллари бозори касод бўлган. 2011 йилда Россия Жаҳон савдо ташкилотига кириш арафасида янги автомобиллар учун импорт божлари 30%ни ташкил этган. Жаҳон савдо ташкилотига кириш талаблари доирасида Россия 7 йил давомида босқичма-босқич божларни пасайтириб борган ва бугунги кунда янги импорт автомобиллари учун импорт божи адвалор шаклида белгиланган ва 15%ни ташкил этади (эскилари учун 17%) . Импорт божлари пасайиб бориши билан ишлаб чиқариш дастлабки 4 йилда қисқариб борган. Лекин импорт ҳам ошиб кетмаган, қайтанга қисқаришни бошлаган (тўғри, бунда рубль курсининг кескин қулаши омилининг алоҳида ўрни бор). Нима бўлганда ҳам, импорт божлари пасайишни бошлагандан кейин 5 йил ўтиб, маҳаллий ишлаб чиқариш ва импорт мувозанати юз берган. Энг асосийси истеъмолчиларда барча сегментларда танлов юзага келган. Таъкидлаш лозимки, автомобиль бозори эркинлашгандан кейин Россияда АвтоВАЗга рақобатчи ўлароқ Hyundai, Volkswagen, Nissan заводлари пайдо бўлган. GM ва Ford эса кучли рақобатга дош бермай заводларини ёпишига тўғри келган. @the_bakiroo