Россия Марказий банки молиявий ваҳимани чеклашга уринмоқда Россия Марказий банкининг бугунги релизига кўра, молия ташкилотлари акция ва облигацияларнинг 2022 йил 18 февралдаги котировкаларини октябргача ишлатишда давом этиши мумкин. Шунингдек, банкларга мажбурий захираларни ҳисоблашда 18 февралдаги курсларни ишлатишга рухсат берилган. Бу билан Марказий банк молиявий компаниялар ва банкларни домино принципи бўйича нотўловларга дуч келиши мумкинлигидан асрамоқчи бўлаяпти. 21 ва 22 февраль кунлари рус рубли ва акциялари ҳаддан зиёд қардсизланганидан хабардорсиз. Россия банкларининг хорижий валютадан фойдаланишга нисбатан чекловларнинг қўлланилиши ва SWIFTдан узилиши мумкинлиги регуляторнинг энг катта хавотири бўлиб турипти. Айтишларича, бунга қарши олдиндан тайёргарлик кўрилмоқда. Масалан, кескинлик бошланишидан аввал Россияга 5 млрд.долларга яқин нақд АҚШ доллари келтирилган. Давлат банкларида турли риск сценарий моделлари синаб кўрилмоқда. Бир неча соат аввал Буюк Британия Россиянинг бешта тизимли банки (хусусан, Россия, Промсвязьбанк, Black Sea Bank, Индустриальный сберегательный банк, Генбанк) ва Путиннинг ўғри дўстлари Тимченко ва Ротенбергга қарши санкцияларни эълон қилди. Тафсилотлар ҳозирча очиқлангани йўқ. Нима бўлганда ҳам, барча кутилмаларга кўра Ғарбнинг бу сафарги санкцион чоралари кўпроқ Россия банк тизимига қаратилади.