Рейтингнинг тубгача пасайиши ва Россия эмитентларининг техник дефолти рус рублининг аҳволини янада оғирлаштирмоқда. Истиқбол эса янада қоронғу Дам олиш кунлари рубль учун биронта қувватловчи воқелик юз бергани йўқ. Суверен рейтингнинг СА даражасигача пасайиши, кеча Роснефть облигациялар бўйича 2 млрд.долларлик тўловни амалга оширмагани, бугун Газпромнинг 1,3 млрд.лик мажбуриятлари бўйича тўлов ҳалигача юз бермагани (юз бермаса ҳам керак) хаосни янада кучайтирди. Одатда Москва биржасида савдолар бошлангач, доллар курсининг бир муддат пастлаши юз берарди. Лекин биржа очилгандан кейин ҳам доллар ошишда давом этмоқда. Айни дамда 1 доллар учун 137 рубль таклиф этилмоқда. Эрталабдан буён доллар яна 10 рублга ошди. Имкони борки, у жисмоний ё юридик шахс, инвестор ё банкир - ҳамма рублдан оёғини қўлига олиб қочмоқда. Россия қорага яқин кулранг тусдаги ишончсиз маконга айланиши учун яна бир белги: Топ тўртликдаги икки йирик аудиторлик компанияси KPMG ва PwC ҳам Россияни тарк этишини эълон қилишди. Топ тўртликдаги Ernst & Young ва Deloitte Touche ҳам кўп куттирмаса керак. Бу нима дегани, бу Россиянинг эмитетентлари ҳисоботларига, молиявий маълумотларига, очиқланаётган ахборотларга заррача ишонч бўлмайди дегани. Россия субъектлари фойдасига ҳар қандай тўлов, битим ё келишув оқибати 100 фоиз риск, яъни йўқотиш билан характерланади дегани. @the_bakiroo