Халқаро захираларимиз қарийб 1 миллиард долларга ошган Февраль ойи давомида олтин-валюта захираларимиз 935 миллион долларга кўпайган ва 35,4 млрд.долларга етган. Захираларимизнинг кўпайиши унинг валюта қисми билан боғлиқ бўлган. Валютадаги захира активларимиз 983 млн.долларга кўпайиб, 13,5 млрд.долларни ташкил этган. Олтиндаги захираларимиз қиймат қолдиғи (20,7 млрд.доллар) деярли ўзгармаган, лекин унинг физик ҳажми 0,7 млн унцияга қисқарган (ўртача 21,7 тонна). Кескинлик ва можаролар билан бошланган февраль олтин сотиш учун жуда қулай давр бўлди. Ушбу қулайликдан фойдаланилиб, Ўзбекистон 30 тоннагача олтин сотган бўлиши мумкин (ҳар ойда ишлаб чиқариладиган ва сотиб олинадиган олтин ўртача ҳажми инобатга олинса). Ўзбекистон олтин-валюта захиралари бўйича энг мустаҳкам ҳимояланган давлатлардан бири ҳисобланади.