Президент шу кунларда божхона постларидан бирининг бошлиғи ҳибсга олингани ва унинг уйидан 400 минг доллар топилгани ҳақида ҳам гапириб ўтипти. Чегаралар қайта ёпилаётгани, тор доиралар манфаати йўлида протекционизм кучайгани, импорт тарифлари ошгани сайин божхонада коррупция ошаверади. Бу табиий ҳол. Шу билан бирга оддий пост раҳбари 400 минг долларни ўзлаштириши ҳақида энг юқори минбардан очиқ айтилаётгани олқишли, лекин бундан аввал минглаб ўзбекистонликларни қашшоқлаштираётган, иқтисодиётга миллионлаб доллар зиён келтирадиган хато қарорлар ҳақида ҳам гапириш керак бўлади. Чунки коррупцияга қарши кураш оқибатларга қарши курашнигина эмас, сабабларни тан олиш ва бартараф этишни ҳам назарда тутади.