Тарихда биринчи марта давлат банкида кузатув кенгаши мустақил аъзолари кўпчиликни ташкил этади Халқ банки Кузатув кенгашининг янги таркибига тўртта мустақил аъзо киритилган. Кенгаш аъзоларининг жами сони 7 нафардан иборат, демак мустақил аъзолар кенгаш таркибида энди кўпчиликни ташкил этишади. Шу пайтгача давлат банклари кенгашларида мустақил аъзолар сони 3тадан кам бўлмаслиги тавсия этилган бўлсада, барча давлат банкларида мустақил директорлар сони 50%дан камроқни ташкил этиб келган. Шунинг учун Кенгашнинг банк сиёсати ва бизнес жараёнларига таъсир ўтказиши амалда имконсиз ҳисобланган. Табиийки, давлат банкларининг бизнес профили, хусусан кредит сиёсати тўлиқ ҳукумат, яъни энг ёмон мулкдорнинг назоратида бўлган . Трансформация, технология янгиланиш чақириқлари ва шиорларига қарамай, давлат банклари ҳукуматнинг агентлари даражасидан ташқарига чиқа олмаган. Истаймизми, йўқми, Украинадаги уруш банкларни хусусийлаштириш ва давлатни банк секторидан кетиш вазифаларини янада кечиктиради. Ўзи бу борада ўзбек давлат банкларининг омади чопмаган. Замонавий корпоратив бошқарувда, моноакциядорга эга банкларда, моноакциядор давлат бўладими ёки хусусийми, кузатув кенгаши аъзоларининг акциядорга тааллуқли ёки алоқадор бўлмаган, асосан мустақил аъзолардан ташкил топиши каррасига самарали ҳисобланади.