Ўзбек банкларининг асосий муаммоси мулкчилик шаклида ва маъмурий аралашувда. Яъни давлат ўзи айбдор банкларнинг шу абгор аҳволига Сенат Раиси тижорат банкларига янги, ёш раҳбар кадрлар тайинлагандан кейин уларни замон талабларига мос равишда ишни ташкиллаштира оладиган қилиб ўқитиш кераклиги юзасидан Марказий банк раҳбариятига тавсиялар берипти. Умуман олганда, яхши, универсал тавсия. "Мы за все хорошее, против всего плохого" қабилидаги ёқимли шиор ҳам. Лекин бу ўзбек банкчилиги билан боғлиқ мавжуд вазиятни заррача ўзгартирмайди. Аввало, айтиш керакки, банк раҳбарларини Марказий банк эмас, Банкнинг акциядорлари тайинлайди, қонун чиқарувчи ўлароқ бу сизга албатта маълум. Давлат банклари мисолида акциядор - бу ҳукумат. Вилоят ва туманларда давлат банклари бўлинмалари раҳбарларини тайинлашга ҳокимларнинг таъсири ҳаддан зиёд, яъни уларнинг "добро"си бўлмаса биронта банкир раҳбар бўла олмайди. Яъни, Танзила опа ўз эътирозларини ҳукумат ва ҳокимларга билдирса, эътирозлар ўринлироқ янграрди. Иккинчидан, Петр Авен ё Олег Тиньковни Халқ банки ё Микрокредитбанкка менежер қилиб олиб келиб қўйсангиз ҳам ҳеч нима ўзгармайди, токи улар қарор қабул қилувчиларга айланмаса, риск аппетит ва риск чегараларини мустақил белгиламаса. Токи банкнинг бизнес фаолияти ҳукумат томонидан белгиланишда давом этар экан (эсланг, давлат энг ёмон ва ёлғончи тадбиркор), қарор қабул қилиш маркази ҳукумат ва ҳокимиятларда қолаверар экан, ҳеч нима ўзгармайди, абгорлашишда давом этаверамиз. Эслаб қолингки, ҳозирги аҳволимиз бу ҳали туб эмас. Биз туб томон ҳаракатдамиз. Оптимизация. трансформация. модернизация, вулканизация деган пўрим сўзлар ва алдамчи ҳаракатлар бу кўзбўямачилик, ундан ортиқ эмас.