Россияда 9 майни қандай кутиб олишди? Масалан, Уфада бир қизни “Бобом фашизмга қарши курашган эди” деб ёзилган плакатни кўтариб чиққани учун полиция олиб кетган. Камида 82 киши урушга қарши шиорларни кўтариб, айтиб чиққани учун қўлга олинган. “Ўлмас полк” акциясига “Улар тинчлик учун курашган эди” деган плакат кўтариб чиққанлар “Россия қуролли кучларини обрўсизлантириш”да айбланиб, 40 минг рублдан жаримага тортилган. “Йўқолсин уруш” ёзувли плакат эгалари қамоққа олинаётгани ҳақида аввал ҳам эшитган, ўқигандирсиз. Нега бундай бўляпти? Чунки “уруш” деган сўз “Россия қуролли кучларини обрўсизлантиряпти” — ахир “Россия қуролли кучлари уруш чиқармайди”, урушмайди, фақат махсус ҳарбий операция ўтказиши мумкин, “урушларни ҳар доим океанортидагилар уюштиради”. Ҳар ҳолда, урушга қарши шиор кўтариб чиққанларни қамаётганларнинг мантиғи шу. Юқоридаги ҳамма гаплар оддий россияликларнинг бугунги тақдири ҳақида. Уларга “махсус ҳарбий операция”ни асл номи билан — “уруш” деб аташ тақиқланган. Оддий бўлмаган россияликларга эса, ҳар доимгидек, кўп нарсалар мумкин. Россиялик Тафсирчи ёзяпти: “Ҳозир ‘Россия 1’ телеканалида Соловьёвнинг дастурини кўриб қолдим. Бугунги кун қоидалари бўйича, бу кўрсатувнинг барча иштирокчиларини лагерларга ташлаш мумкин. Ҳақиқий ‘олтинчи колонна’. Масалан, режиссёр Шахназаровнинг айтишича, ҳеч қандай ‘махсус операция’ бўлаётгани, аксинча, Украина билан уруш бўляпти. У “уруш” деган гапни бир неча марта такрорлади, Соловьёв эса уни маъқуллаб турди. Ваҳоланки, ҳозир бунинг учун 15 йилга қамалиш мумкин: бу Россия қуролли кучлари ҳақида хизмат мансабидан фойдаланган ҳолда фейк ахборот тарқатиш ҳисобланади. Соловьёвнинг чойхонасида ўтирганларнинг ҳаммаси ҳам қамалиши керак — негаки, улар Шахназаровнинг жинояти ҳақида тегишли ташкилотларга ўз вақтида хабар бермаяпти. Ҳозир кўзойнак таққан зиёлиларга бундан-да юмшоқроқ фикрлари учун жиноят ишлари қўзғатиляпти ахир. Шундан сўнг Шахназаров жуда чуқур тарих ҳақида гап сота бошлади — эмишки, Англия ва Франция Гитлерга қарши уруш эълон қилган, Гитлер эса буни қабул қилишга мажбур бўлган экан. Бу гап учун ҳам Жиноят кодексида нацизмни реабилитация қилиш деган модда бор. Умуман олганда, буларнинг бари цивилизацион деградация. Биз ҳозир бир вақтнинг ўзида бир неча авлод илгариги ота-боболаримизнинг Ретротопиясида яшамоқдамиз. Бунда аждодларимиз 1916, 1952, 1601 йилларда нималарни ҳис қилиб яшаганини яхши англаш мумкин”.