Ижтимоийлашган энергетика ислоҳоти ўтказилиши анонсланмоқда Узоқ кутилган ўзгаришларнинг вақти келганга ўхшайди. Бугун бирданига учта вазирлик — Иқтисодий тараққиёт ва камбағалликни қисқартириш, Молия ҳамда Энергетика вазирликлари қўшма баёнот билан чиқиш қилган. Ошкор қилинган позициялардан англашилича, бугунги статус-кво энергияга нисбатан шиддат билан ошиб бораётган талабга яраша таклиф яратишга - электр генерациясини оширишга ва газ қазиб олишни кўпайтиришга рағбат бермайди. Мавжуд тизим эскириб бораётган инфратузилмани янгилашга ҳам, харажатларни минималлаштиришга ҳам, йиғилган мажбуриятлар ва қарзларга сифатли хизмат кўрсатишга ҳам, янги лойиҳалар учун инвестицияларни жалб қилишга ҳам хизмат қилмайди. Шунинг учун табиий газ ва электр энергия тарифларини бозор рельсларига ўтказишдан ўзга муқобил чора қолмаган. Фақат бозор томон ҳаракат ижтимоий адолат тамойиллари асосида рўй бериши керак. Нархларни эркинлаштиришда ижтимоий адолат қандай таъминланади? Энг аввало ижтимоий ҳимояга муҳтож қатламлар, хусусан пенсия ва болалари учун нафақа олувчиларни қўллаб-қувватлаш йўли билан. Шунингдек, энергия истеъмол қилишнинг ижтимоий нормасини жорий қилиш орқали. Вазирликлар ўтказган таҳлиллардан келиб чиқилса, ижтимоий норма ойига электр учун 200 кВт.соат, газ учун эса 500 куб метр бўлиши мумкин. Яъни шу норма доирасида арзон энергия тарифлари сақланади, назаримизда. Бу ҳақда тез орада батафсилроқ билиб олишимиз мумкин. Чунки ташаббускорлар норматив-ҳуқуқий ҳужжат лойиҳаси муҳокамага қўйилишини ҳам маълум қилишган.