Иш ҳақи ошди. Иш ҳақининг энг кам миқдори янаям тезроқ ошиши керак Бюджет ходимларининг иш ҳақлари 12%га ошгани эълон қилинди. Албатта яхши хабар. Кучайиб бораётган инфляция ва энергетика ислоҳотлари арафасида даромадларнинг индексация қилиниши ижтимоий сиёсатнинг ҳали ҳам муҳимлиги ва аҳамиятли эканини кўрсатади. Шу билан бирга, меҳнатга ҳақ тўлашнинг энг кам миқдори тезроқ, юқорироқ суръатда ошириши маънолироқ кўринади. Нега? Чунки, расмий иш ҳақи даражасининг динамикасига кўра, иш ҳақи миқдори 1 миллион сўмгача бўлганлар жами даромад солиғи тўловчиларнинг учдан бирини ташкил этади. 1 миллион сўмлик иш ҳақи билан қандай инсон сифати ва истиқболи яралиши мумкин? Қорин тўйдиришга етмайдиган маош билан меҳнат унумдорлигини кун тартибига олиб чиқиб бўладими? Афсуски, Профсоюз ғоясининг ўлдирилганлиги (эски даврда профсоюз шотирлари сиёсий ҳокимиятнинг беминнат хизматкори бўлган бўлса, янги даврда унинг асосий иттифоқчиси ва шеригига айланган) ва иш берувчиларнинг мутлақ гегемонияси шундай шароит яратганки, ишчилар синфи мумкин бўлган энг паст окладларда ушланади. Нима қилмоқ керак? Иш ўринларининг сунъий ва табиий дефицити шароитида иш берувчиларга ишчилар синфининг эксплуатацияси орқали рентани оширишни тийиб туриш механизмлари жорий қилиниши зарур. Бу энг аввало ойлик энг кам иш ҳақларини юқори суръатда ошириб бориш ва бундан буёғига нафақат ойлик, балки кунлик ва соатлик энг кам иш ҳақлари миқдорларини давлат томонидан белгиланишини талаб этади. @the_bakiroo