Индексация ҳақида Ниҳоят охирги марта оширилганидан 11 ой ўтиб, пенсия ва нафақалар (1 апрелдан), бюджет ташкилотлари ходимларининг иш ҳақлари (1 майдан) 7%га индексация қилиниши маълум қилинди. Маълумот учун, охирги индексациядан кейинги даврда йиғилган инфляция март якунларига кўра 10%га, озиқ-овқат инфляцияси 13%га яқинлашади. Қачонлардир, умидли кўринган янги замоннинг бошида бюджетдан тўланадиган ойлик, пенсия ва нафақаларни инфляция даражасидан кам бўлмаган миқдорда ошириш принциплари эълон қилинган ва амалда бир неча йил бу сиёсат давом эттирилган эди. 2022 йилдан бошлаб бу борада узвийлик йўқолди. Эътиборлиси, солиқлар, божлар, турли жарималар ва минимум тўловлар белгиланадиган базавий ҳисоблаш миқдори роппа роса 10%га, 330 минг сўмга оширилган. Талабаларнинг стипендияси индексация қилинмаган. Лекин контракт суммалари ошаётган базавий ҳисоблаш миқдорига боғланганини унутмаслик керак. Яна бир қизиқ ҳолат меҳнатга ҳақ тўлашнинг энг кам миқдори 6,5%га индексацияланган ва 980 минг сўм этиб белгиланган. Айтиш керакки, бизнеснинг жуда катта қисми меҳнатга ҳақ тўлашнинг энг кам миқдорини қўллайди. меҳнатга ҳақ тўлашнинг энг кам миқдори тезроқ ошириб борилса, давлат ҳам ойлигини оқартирувчилар ҳам кўпроқ ютган бўларди.