АОКАнинг собиқ раҳбари, Миллий масс-медиани қўллаб-қувватлаш ва ривожлантириш жамоат фонди васийлик кенгаши раиси Комил Алламжоновнинг «Улар» лойиҳасига берган интервьюсини кўрдим. Интервьюда Алламжоновнинг «Ҳар қандай ижод лицензияланиши керак эмас. Ижод эркин бўлиши керак. Бу ҳам сўз эркинлигига киради», деган фикрлари жуда ёқди менга. «Ўзбекконцерт»нинг санъаткорларни лицензиядан маҳрум этиш сиёсати одамларда давлат раҳбариятининг қўли бор экан деган салбий фикр шакллантирмоқда. Ваҳоланки, раҳбариятнинг бундан хабари ҳам йўқ, бу ишларнинг ҳаммасини «Ўзбекконцерт»нинг ўзи мувофиқлаштиради, тартибга солади. Ўз ўрнида бу тўғридан-тўғри очиқлик ва эркинлик сиёсатига таҳдид ҳолат деб ҳисоблаганим учун бу ҳолатга муносабат билдирдим», деган Алламжонов. Бу фикрлар «Ўзбекконцерт» деб аталадиган «аждаҳо» ташкилотга нисбатан билдирилган. Ростдан ҳам, «Ўзбекконцерт» нега қўшиқчиларни лицензиялайди? Нега давлат телеканаллари ёки хусусий ТВлар ана шу лицензия асосида ким экранга чақарилиши керак ёки йўқлигини ҳал қилади? «Ютюб»дан ўчир клипингни», дейишга ҳам ўтишипти, эшитдик. Чунки «Ўзбекконцерт» қўшиқчиларни бир тизгинда ушлаб туриш учун ташкил қилинган. Унинг раҳбари эса «юқори»даги катта-катта лавозимдорларнинг тўй-маъракасига артистларни текинга хизмат қилдириб, обрў олади. Қани, лицензиялаш тўхтатилсин, бу ташкилот ва унинг раҳбарининг сариқ чақачилик аҳамияти қолармикан? Нега ижод қилиб шеър ёзган шоир, ўша шеърга куй басталаган композитор лицензия олмас экан-да, уни қўшиқ қилиб куйлаган санъаткор лицензияланади? Чунки шоир ва бастакор тўйда обрў олиб келмайди-да! Шоир ва бастакор тўйнинг орқасидан кун ҳам кўрмайди. Уларни ижод қилишдан тўхтатиб бўлмайди. Лекин санъаткор учун «кислород крани» — ТВга, тўйга чиқишни осонгина ёпиш мумкин. Тўй бўлсин! Ўша катталар ҳам қилсин. Ҳаққи бор. Лекин «соққа»сини тўлаб қўйсин артистга хизмати учун, марҳамат қилиб. Артист эса даромадидан солиқ тўласин. Ўша «каттакон» эса артистга тўланаётган чакана бўлмаган пулни қаердан олганини декларациясида кўрсатсин. Кўраяпсизми, вазият қанақа чалкаш? «Ўзбекконцерт», унинг раҳбари ва у берадиган лицензия аслида нимага хизмат қилмоқда? Боз устига, репрессияга учраган санъаткорга «Ўзбекконцерт» раҳбарияти томонидан зуғумлар аслида энг олий раҳбариятдан бўлаётгани тушунтирилади. Ёлғон бу! Баҳона учун келтириладиган мавҳум маънавият, «оммавий маданият», «ғарбнинг таъсири» ва бошқа бало-баттарлар — шунчаки ширма. Муҳими — статус! Мужик окаларининг «масала»сини ечмоқда! Дарҳақиқат, «Ўзбекконцерт»нинг лицензиялаш балосидан маҳрум этилиши, жамиятимизнинг шаффофлашуви ва очиқлиги юзасидан ташланган энг улкан қадамлардан бири бўлар эди. Санъаткорнинг ижодию, юриш-туришига халқ баҳо берсин... Парда! Каналга обуна бўлинг: 👉 @shokirjonov