Банк тизимидагилар изтироб билан эсласа керак, бундан 2 йил аввал, кейин ўтган йили ҳам барча тижорат банклари гўёки ўзлари келишиб қатор банк хизматларини бепул қилиш ва айрим хизматлар бўйича тарифларнинг энг юқори даражасини чеклаш тўғрисида Меморандум имзолашга мажбур бўлишган эди. Кейин бир муддат ўтиб, шу гўёки ихтиёрий тузилган Меморандум шартларига амал қилинмагани, мижозлардан кўрсатилган хизматлар учун (!) ҳақ олингани асос қилиниб қатор тижорат банклари намойишкорона жазоланган ҳам. Гўёки тадбиркорлар ва банк мижозлари манфаатини кўзлаб қилинган бундай гибрид ғамхўрлик якунда нима оқибатларга олиб келди? Банклар ўша меморандумда бепул дея кўрсатилган хизматларни яхшилашга, ёки тарифлари чекланган маҳсулотларни кенгайтиришга умуман эътибор қилмай қўйди, бу йўналишларга пул тикиш тўхтади. Ахир қайси аҳмоқ зарар келтирадиган ёки фойдаси йўқ маҳсулотни сотишга урғу беради. Охири нима бўлди, гўёки мижозлар манфаатини кўзлаб, мажбурлаб, яна калтафаҳмлик билан тузилган Меморандум мижозларнинг ўзини жазолай бошлади. Ўтган 2 йилда бу аҳмоқона Меморандум Банк тизимига қанча миллиард зарар келтирди, бюджет қанча солиқ тушумидан маҳрум этилди - энди бу бутунлай бошқа масала. Ҳар қандай абсурднинг боши бор, яхшики - охири ҳам бор. Кейинги ойларда, айниқса имтиёзли ставкалардан воз кечила бошлангач, тушуниб етилдики, Меморандум бу банк тизимига ўтган йилларда билиб-билмай етказилган энг катта зарарлардан бири ва ундан қандайдир йўл билан воз кечиш лозим. Албатта ҳеч ким чиқиб аҳмоқ эканмиз, хато қилган эканмиз, деб тан олмайди. Лекин қувонарлиси, ўша ярамас Меморандумни рўкач қилиб тижорат банкларини жазолаш практикаси энди қўлланилмаяпти ва манбаларнинг ишонтириб айтишларича бундан буён қўлланилмайди ҳам ва тижорат банклари ўзларининг тариф сиёсатларини ўзлари мустақил, бозор талаблари асосида белгилашлари мумкин. Қанақадир, учинчи сорт кўрсатма хатлар, меморандумлар, фармойишларга эмас, ўзимиз Қонун даражасида белгилаган қоидаларга ўзимиз амал қилишни бошлаганимиз қандай яхши. Нима дейсиз? @the_bakiroo