"Мир" тўлов тизими билан ҳамкорлик қилувчилар санкцияларга тортилиши мумкин Америка Қўшма Штатлари Молия вазирлиги Россиянинг "Мир" тўлов тизими билан янги битимлар тузаётган ёки амалдаги келишувларни кенгайтираётган молиявий ташкилотларни санкциялар риски ҳақида огоҳлантирмоқда. Бундай ташкилотлар Россияни АҚШ санкцияларини четлаб ўтишда кўмак бераётган деб топилиши мумкин. Ҳозирда "Мир" карталаридан Туркия, Вьетнам, Арманистон, Беларусь, Қозоғистон, Қирғизистон, Тожикистон ва афсуски Ўзбекистонда ҳам фойдаланиш мумкин. Айни вақтда "Мир" тўлов тизим оператори "Национальная система платежных карт"га қарши санкциялар қўлланилмаган. Лекин бугун эълон қилинган янги санкция рўйхатига "Национальная система платежных карт" бош директори Владимир Комлев ҳам киритилган. Ўзбек банклари "Мир" тизими билан битимлар тузишдан ва тузилган битимлар бўйича ҳамкорликни кенгайтиришдан ўзларини тийиб турганлари маъқулроқ бўлади.