Uzcard ТАССга ҳисоб берди: МИР карталарини қабул қилишни давом эттирмоқдамиз Ҳар қандай тизимда ҳимоя инстинкти ёки ўзини ўзи асраш функциялари ишлаши керак. Лекин Ўзбекистон тизимлари ҳақида бундай деб бўлмайди. UzCard маъмурияти собиқ катта оғанинг пропаганда карнайи ТАССга ҳисоб топширипти: "Ягона умумреспублика процессинг маркази" — UzCard МИР тўлов тизими карталарини қабул қилишни давом эттирмоқда. Туркия, Вьетнамни қўя туринг, ҳатто Россиянинг ЕОИИдаги иттифоқдошлари Қозоғистон ва Арманистон банклари, тизимлари эртага юз бериши мумкин бўлган санкцион оқибатлардан келиб чиқиб, "МИР" карталарига хизмат кўрсатишдан воз кечаётган вақтда юз бераяпти бу. UzCard ва Мир 2019 йилдан буён эквайринг ва кобейдж карталари чиқариш бўйича ҳамкорлик қилади. Ҳамкорлик фақат бир тарафлама, катта оға ва кичик ука форматида. Хусусан, Мир карталари билан UzCard инфратузилмасида фойдаланиш мумкин, лекин UzCard карталаридан (агар кобейдж бўлмаса) Россияда Мир инфратузилмасида фойдаланиш имконсиз.