Депозитлар ўсиш суръати секинлашган, лекин барибир юқорилигича қолмоқда Август ойида ўзбек банкларининг депозитлари қолдиғи 10,2 трлн.сўмга ўсган (+5,2%). Ўсиш суръатлари аста-секин пасаймоқда, лекин барибир юқорилигича қолмоқда. Бу ойда ҳам депозит жамғаришда давлат банклари илғорроқ бўлишган. Халқ банки (+2,7 трлн.сўм), Асакабанк (+1,3 трлн.сўм) ва Миллий банк (+1,1 трлн.сўм) ўта фаол ишлаган. Халқ банки чакана, яъни аҳоли депозитларини ҳам 1,1 трлн.сўмга кўпайтира олгани жуда қизиқ. Чунки ўтган ойда банк тарафидан бозордан катта фарқ қиладиган депозитлар ё бошқа маҳсулотлар таклиф этилмаганди. Хусусий банклар орасида Капиталбанк етакчилиги сақланиб турипти. Банк ўтган ойда депозитлар қолдиғини 826 млрд.сўмга ошира олган. Азия Альянс банк (+485 млрд.сўм) ва Ҳамкорбанк (+400 млрд.сўм) кейинги ўринларни эгаллаган. Чакана депозит жамғаришда Ипак йўли банк (+324 млрд.сўм) ўта фаол бўлган. Кредит ажратиш ва депозит жамғаришда давлат банкларида катта диспропорциялар сақланиб қолаётган бўлса, хусусий банкларда мазкур дельтанинг мувозанати сақланиб турипти.