Тақчиллашган ишонч янги чекловларга етакламаслиги керак! Ўз сўзимиз ва дардимизни глобал кун тартибига етказишда катта давлатларнинг вазни ва манфаатлари билан эгаллаб олинган номи улуғ ташкилотлардан кўра Осиёда ҳамкорлик ва ишонч чоралари бўйича кенгаш каби платформалар биз учун аҳамиятлироқдир. Астанада ўтаётган кенгашнинг олтинчи саммитида Президент Мирзиёев эътибор қаратган масалалар қатор мамлакатларнинг худбинлиги ва кетма-кет хатолари туфайли кириб қолинган боши берк кўчани тўлиқ тасвирлаб беради. "Бугун биз халқаро муносабатларда ноаниқлик тобора ўсиб, мулоқот ва ишончнинг мисли кўрилмаган даражада тақчил бўлиб бораётганига гувоҳ бўлмоқдамиз. Буларнинг барчаси кўп томонлама ҳамкорлик асосларига путур етказмоқда, можароларнинг авж олишига сабаб бўлиб, глобал иқтисодиётда тизимли узилишларга олиб келмоқда. Юзага келган янги геосиёсий воқелик бутун Осиё қитъаси барқарорлигига салбий таъсир кўрсатмоқда... Инқирозли ҳолатлар Марказий Осиё давлатларига ҳам тўғридан-тўғри дахл қилиб, иқтисодий интеграцияни чуқурлаштириш бўйича бизнинг саъй-ҳаракатларимизни секинлаштирмоқда", деб айтган Ўзбекистон раҳбари. Шунингдек, тақчиллашган ишончни тиклаш янги чегараларни бунёд қилиш билан битмаслигига урғу берган Шавкат Мирзиёев иқтисодиётларимизни глобал инқирознинг ўсиб бораётган салбий оқибатларига мослаштириш зарурлигини кўрсатиб ўтиб, бу ўринда протекционизмнинг кучайишига, глобал бозорларни беқарор қиладиган омилларни, жумладан янги чекловларнинг жорий этилишига йўл қўймаслик кераклигини биринчи ўринда таъкидлаган.