​Россиянинг Urals навли нефти икки баробар арзонроқ сотилмоқда. Ўзбекистон бундан фойдаланмоқдами? Россия нефти учун потолок нархлар белгиланганидан кейин, Urals типидаги нефть маркаси учун чегирмалар ошиб бормоқда. Ўтган ҳафтада Brent ва Urals нархлари орасидаги фарқ икки баробардан зиёдга кенгайган. Brent 78,57 доллардан сотилган бўлса, Urals чегирмалар билан 37,80 доллардан сотилган. Urals'нинг декабрдаги ўртача нархи 50 доллардан пасайганди. Ўзбекистон ҳам Россия нефтини импорт қилувчи давлатлардан ҳисобланади. Лекин шу пайтгача импорт шартлари ва бунда рус нефти учун қўлланилаётган чегирмалардан худди ҳиндлар ё хитойлар каби бизнинг импортчилар ҳам фойдаланаётгани ёки умумий нархларда сотиб олинаётгани бўйича маълумотлар очиқланмаган. Нефть бўйича эмбарго ва газ экспортининг кескин қисқариши йил охирида Россия бюджетида диспропорцияларни кучайтирган. 2022 йил бўйича жами 3,35 трлн.рубль дефицит қайд этилган. Январь ойида нефть учун потолок нархлар янада пасайтирилиши кутилмоқда. Шунингдек, Катта еттилик давлатлари нефть маҳсулотлари, дизель, мазут ва нафтага ҳам потолок нархлар белгиламоқчи бўлаяпти. Одатда ушбу маҳсулотлар ўртача нефть нархидан қимматроққа сотиб келинган.