Нефть арзонламоқда, Россия нефти ва бензинига харидор йўқ Икки ҳафта деганда, биринчи марта нефть котировкалари брент учун 100 доллардан пастга тушди. Ўтган ҳафта нефть нархи 140 долларгача етганди. Нефть нархи ҳаддан зиёд кўтарилганига қарамай, Россия нефтини сотишда катта қийинчиликларга дуч келмоқда. 30 долларгача етаётган дисконт таклифлари ҳам рус нефтига харидорларни қизиқтира олаётгани йўқ. Хусусан, "Зарубежнефть" ва "Сургутнефтегаз" ўтказган тендерларнинг барчаси ҳаридор йўқлиги учун бекор қилинган. Ташқи бозорга сотувнинг йўқлиги Россия ҳудудида бензин нархларига таъсир кўрсата бошлаган. Бензиннинг улгуржи биржа нархлари 9-12%гача арзонлашган. АЁҚШлардаги чакана нархлар ҳам секинлик билан бўлса-да, тушмоқда. Омборлар бензин ва дизель ёқилғисига тўлиб кетган. Юзага келаётган вазият ва санкциялар қақшатаётган рус бензинига таклифнинг йўқлиги Ўзбекистон учун жуда қўл келади. Ўтган 2021 йилда Россиядан 172,5 млн литр бензин импорт қилинган.