Очиқ қолаётган савол: Яндекс.Такси солиқ тўлаяптими? Ўтган уч кун давомида расмийлар, масалан, солиқчиларимиз ё антимонополия органлари тарафидан бирон муносабат бўлгани йўқ. Лекин мулоқотда бўлган ва мавзуга дахлдор шахсларнинг таъкидлашича, Яндекс.Такси солиқ тўловчи сифатида ваколатхона ё доимий муассаса ўлароқ рўйхатдан ўтмаган. Яндекс.Такси Ўзбекистонда солиқ тўлаши лозимлиги тўғрисида бундан бир неча йил аввал Давлат солиқ қўмитаси раиси ўринбосари Мубин Мирзаев ҳам ўзининг фикрларини баён қилган экан. Орадан тўрт йил ўтди, Яндекс.Таксининг Ўзбекистондаги бизнеси бир неча юз каррага кенгайди. Лекин савол очиқлигича қолмоқда. Дарвоқе, Яндекснинг тўловлар ва интернет секторидаги бизнесига дахлдор Yandex Europe AG электрон хизматлар кўрсатувчи ўлароқ рўйхатдан ўтган экан. Очиқ маълумотларга кўра, Yandex Europe AG'нинг Яндекс.Такси сервисига алоқаси йўқ, Солиқ қўмитаси маълумотига кўра, Yandex Europe AG электрон хизматлар кўрсатувчи ўлароқ, 2022 йил 11 ойда 445,5 млн.сўм солиқ тўлаган. Очиқ маълумотларга кўра, Тошкент шаҳрида агрегаторнинг такси хизматлари кўрсатишда олаётган ва бизнингча, солиққа тортишдан четда қолаётган комиссияси ҳисобланган йўл ҳақининг 13%гача қисмини ташкил этади. Яндекс.такси Ўзбекистондаги партнерлари (улар солиқ тўловчи сифатида рўхатдан ўтишган) оладиган комиссия ҳисобланган йўл ҳақидан ўртача 5%. Улар бу даромадлардан солиқ тўлашади.