Олтин котировкалари тарихий максимумларга яқинлашди Бугун тонгда бир унция олтиннинг спот битимлари бўйича котировкалари 2055 долларгача кўтарилди ва 2020 йилда қайд этилган 2070 долларлик тарихий максимумга жудаям яқинлашди. Олтин нархларидаги ўзгаришлар бир тарафдан рецессия эҳтимоллари ошаётгани, иккинчи тарафдан Қўшма штатлар ғазначилиги қоғозлари даромадлилиги пасайиб бораётгани фонида кузатилмоқда. Олтин кескин кўтарилган лаҳзаларда доллар индекси йиллик минимумларни қайд этгани ҳам эътиборга молик. Яъни инвесторлар ва спекулянтлар қарорлари ва ҳаракатларида хатарлар ва хавотирлар олд планга чиқмоқда. Аксар прогнозларда федерал захира тизими фоиз сиёсатини қаттиқлаштиришда давом этиши ёки юмшатишга ўтиши мумкинлиги борасида юқори аниқлик йўқлиги туфайли яқин 3-6 ой истиқболда олтин нархлари ўсиш трендида қолиши айтилмоқда . Бугун эрталаб Марказий банк томонидан ҳар куни белгиланадиган ўлчовли олтин қуймаларни сотув нархлари ҳам максимумларни янгилади. Хусусан, 50 граммлик қуйманинг сотув нархи 38 768 000 сўмгача кўтарилган.