​Статистика: Ўзбекистонликлар январь-март ойларида рекорд даражада бойиган Бизнес ва аҳоли ўз танасида ва чўнтагида ўтказган кризисли қишга қарамай, 2023 йилнинг биринчи чорагида аҳолининг реал даромадлари 10,8%га ўсган. Бу янги даврдаги мутлақ рекорд кўрсаткич ҳисобланади. Солиштириш учун, аҳолининг реал даромадлари мос тегишли даврларда ўтган 2022 йилда 5,4%га, 2021 йилда 9,8%га, 2020 йил 7,6%га, 2019 йилда 8,6%га, 2018 йил 10,6%га, 2017 йилда эса 9,3%га ўсган (йиллик ҳисобда). Яъни, расмий статистика назарида ўзбекистонликлар росмана тўқ йиллар ҳисобланган 2017-2019 йилларда ҳам 2023 йил январь-март ойларидек суръатда бойимаган. Саноат, қурилиш, транспорт ва сервиснинг қатор соҳалари ҳафталаб, ойлаб тўхтаб қолган ва ишчи, ходимларга ўз ҳисобларидан жавоб бериб юборилган бир шароитда, халқаро пул ўтказмалари ўсишдан қисқаришга ўтган даврда аҳоли реал даромадларининг кескин, рекорд даражада ўсишига қайси омил ёки омиллар туртки бўлгани жудаям қизиқ. P.S. Шу ўринда эсга тушадики, ўтган ёмон дейиладиган ва тош отиладиган даврда ҳам ўзбек статистикасига ҳеч ким ишонмаган. Рақамлар фақат бир шахс учун тайёрланганига қарамай, гарчи унга қатор саволлар бўлсада, статистика ўз рақамларини реаллик билан бироз ҳисоблашган ҳолда шакллантириб келган. Чунки ҳеч бўлмаганда маълумотлар тақдим этиладиган ўша одам, гарчи деярли изоляцияланган бўлсада, сўраб қолиши эҳтимоли бўлган. Масалан, 2000 йилдан 2013 йилгача аҳоли реал даромадлари ўсиши бирон марта икки хоналидан бир хонали даражага туширилмаган. Лекин Россия Қримнинг босиб олиши ортидан юзага келган кризисли 2014 ва 2015 йилларда реал даромадларнинг ўсиши 8,9% ва 9,6% деб эълон қилинган холос. Зеро ўша маълумотлар тақдим этиладиган одам Россиянинг Қримни босиб олиши, Донбассга ҳужуми, санкциялар, антисанкциялар, рубль курси, бунинг Россия иқтисодиётига таъсири, кейин Ўзбекистонга таъсирини ҳарқалай ўзига тасаввур этиб, хомчўт қила олган.