Ўзбекистонда июнь ойида туризм биринчи рақамли экспорт моддасига айланган Июнь ойида олтин сотилмаган бўлса ҳам ташқи савдо мувозанати деярли таъминланган ва дефицит ўсиши секинлашган. Июнда амалга оширилган 1 628,5 млн.долларлик экспортнинг таркиби жуда қизиқ. Экспортнинг 31%идан кўпроғи ёки 51,7 млн.долларлик қисми хизматлар ҳисобига тўғри келган. Ўзи умуман йил бошидан олганда, экспорт таркибида гуруҳлар ичида олтиндан кейинги иккинчи ўринни айнан хизматлар эгаллаган. Экспорт моддалари ичида эса туризм ўтган ойда биринчи ўринга чиққан, агар адашмасам, бу эски, янги ва яп-янги тарихда биринчи марта юз берди. Июнда жами 226,3 млн.долларлик туристик хизмат кўрсатилган (йил бошидан буён эса 1 млрд.доллардан ортиқ). Солиштириш учун шу ойда 218,7 млн.долларлик тўқимачилик маҳсулотлари экспорт қилинган. Туристик маҳсулотлар экспортини ҳисобга олиш шаффофлиги таъминланаётган бўлса, бу жуда катта кўрсаткич ва олқишланадиган ютуқ (ҳисоб методологияси бошқа моддалардан фарқланади). 32 йил деганда ниҳоят Ўзбекистон экспортида хом-ашёдан бўлак яна нимадир пайдо бўлди. Июнь ойи экспорти маълумотлари ичида Ўзбекистон ўзи ишлаб чиқармайдиган, эҳтимолки, Россияга реэкспорт қилинаётган машина ва транспорт асбоб-ускуналарининг ўсиши секинлашган. Баъзида соғлом ақл эмас, жазо муқаррарлиги ва қўрқув ҳаммасини жойига қайтаради. Импорт таркибида структуравий ўзгаришлар кам. Июнда нефть маҳсулотлари (73,5 млн.доллр), газ (46,9 млн.доллар), кўмир (11,9 млн.доллар) ва электр энергияси (13,1 млн.доллар) импорти янада тезлашган. Озиқ-овқатлар (160,5 млн.доллар) ва автомобиллар (98,5 млн.доллар) импортининг ўсиши секинлашган. Мамлакатлар қирқимини олсак, Туркия импортимизда топ-5таликдан чиқиб кетгани эътиборли. Туркия экспортимизда топ-3таликдан ҳам чиқиб кетган. Ваъда қилинган Туркия билан эркин савдо зонаси қачон амалга ошишини сўраш вақти келди, менимча. Чунки Ўзбекистон Жаҳон Савдо Ташкилотига яқин орада киришига ва бундай хоҳишларга амалий ирода мавжудлигига деярли ҳеч ким ишонмайди.