Олтинсиз экспортнинг ўсиши импортнинг ўсишидан жиддий ортда қолмоқда Ўтган 7 ойда олтинсиз экспорт 10,3%га, импорт ҳажми эса 18,1%га ўсган. Яъни бу вақт учун рекорд даражада экспорт қилинган олтинни (5 637,5 млн.доллар) ҳисобга олмаса, ташқи савдо дефицити фақат кенгайиб бормоқда. Валюта курсининг августда бироз тўғирланиши мувозанатни тиклашга ёрдам бериши мумкин. Хитой билан савдо тўртинчи ой кетма-кет ўта фаол ўсмоқда. Июль ойида жами импортнинг 37,8%и (1 130,7 млн.доллар), олтинсиз экспортнинг 31,8%и (493,0 млн.доллар Хитой ҳиссасига тўғри келган). Германия билан импорт ҳажми қайта кўриб чиқилган. Германиядан самолётлар импорти бўйича 274,2 млн АҚШ доллари миқдорида камайиш тузатишлари киритилган. Демак, камида 3та самолет Ўзбекистон учун эмас, транзит мақсадида ҳарид қилинган. Ишқилиб, Путин Россияси учун санкцияларни четлаб ўтишга ёрдам бериш схемаси бўлиб чиқмасин. Қардош Қозоғистон билан савдо ҳажми ва улуши секинлашишда давом этмоқда. Бу кетишда Ўзбекистон Қозоғистоннинг Топ-10 ҳамкори қаторидан чиқиб кетади. Ўзбекистоннинг Топ-3 экспорт бозори рўйхатидан Қозоғистон чиқиб бўлди. Газ экспорти гўёки Ўзбекистонда газ билан боғлиқ ҳеч қандай муаммо йўқдек давом этмоқда. Июлда 63,5 млн.долларлик газ экспорти юз берган. Хизматлар экспорти ўсиши секинлашган. Биринчи рақамли хизмат экспорти ўрнини Туризм яна Транспорт хизматларига бўшатиб берган. Газ импорти деярли тўхтаган. Кўмир импорти тезлашган. Автомобиллар импортининг ўсиши юқори суръатда давом этмоқда. Хизматлар импортининг қисқариб (туризмдан ташқари) бораётгани алоҳида ўрганишларни талаб этади.