Ўзбек бойларининг севимли ўлкалари Литва, Латвия ва Швейцариядан импорт кўпайган Ташқи савдода импортнинг ўсиши юқорилигича қолмоқда. Валюта курсининг августдаги тўғирланиши мувозанатни тиклашга етарли бўлмаган. Ўтган ойдаги 3,6 млрд.долларлик импортнинг энг катта қисми Хитойга тўғри келган (қарийб 1,2 млрд.доллар). Шу билан бирга, топ-5ликда Қозоғистон, Корея ва Туркиядан импортнинг ўсиши тезлашган. Эътиборлиси, ўзбекистонлик бойлар пулини олиб чиқиб кетадиган йўналишлар —Литва, Латвия ва Швейцариядан импорт жуда юқори суръатда ўсмоқда. Августда 2,5 млрд.доллардан ортиқ қийматда машина ва ускуналар импорт қилинган. Шундан 451,1 млн.долларлик қисми автомобиллар. Августда газ деярли импорт қилинмаган (0,8 млн.доллар), электр энергияси импорти эса умуман рўй бермаган. Лекин кўмир импорти фаол давом этмоқда. Ўтган ойда 18,4 млн.долларлик кўмир импорт қилинган. Импорт портиллаб ўсаётган бир вақтда экспортнинг ўсиши секинлашишда давом этмоқда. Хитойга экспортимизнинг қисқариши тўхтагани йўқ. Лекин Туркия, Қозоғистон ва Афғонистонга экспорт анча жонланмоқда. Ўтган ойда 36 млн.долларлик газ экспорт қилинган. Машина ва транспорт асбоб-ускуналари экспорти яна кўпая бошлаган, шу жумладан, ички бозорда юқори даражада дефицит бўлиб турган автомобиллар экспорти ҳам. Ўтган ойда асосий экспорт товаримиз бўлган олтин экспорти амалга оширилмаган.