Аномал статистиками ёки "корректировка": Сентябрда ўтган 8 ойда импорт қилинганидан 1,4 баробар кўп газ импорт қилинган Сентябрда ойлик импортнинг ўтган йилнинг тегишли даврига нисбатан ўсиши 29,0%ни ташкил этиб, 3,4 млрд.долларга етган. Ойлик экспорт эса ўтган йилнинг сентябрига нисбатан 13,7%га қисқарган ва 1,3 млрд.долларни ташкил этган. Табиийки, савдо дефицити ўсишда давом этмоқда ва 9 ойлик якунларга кўра 9,3 млрд..доллардан иборат бўлмоқда. Сентябрдаги импортнинг 31,0%и ёки 1,1 млрд.долларлик қисми яна Хитой ҳисобига тўғри келган. Яна Туркманистондан импорт сезиларли даражада ошгани эътиборли. Туркманистондан импорт ошгани асосан газ билан боғлиққа ўхшайди. Сентябрда оз эмас, кўп эмас, 286,1 млн.долларлик газ импорти расмийлаштирилган. Бу январь-август ойларида импорт қилинганидан 1,4 баробарига кўпроқ. Аввалроқ газ импорти бўйича расмий статистика маълумоти билан Иқтисодиёт ва молия вазирлиги ҳисоботларида катта фарқ юзага келганини ёзган эдик. Эҳтимолки, статагентлик аввалги ойларда амалда юз берган газ импортини энди статистикага қўшмоқда. Шунингдек, сентябрда нефть (87,1 млн.доллар), кўмир (22,7 млн.доллар) ва электр энергияси (7,7 млн.доллар) импорти августга нисбатан фаоллашган. Автомобилларга оид импорт августга нисбатан бироз секинлашган ва 375,9 млн.долларни ташкил этган. Паст нархлар туфайли сентябрда ҳам олтин экспорти юз бермаган. Газ экспорти ҳам қисқармоқда (33,8 млн.доллар). Машина ва транспорт асбоб-ускуналари гуруҳига кирувчи, Ўзбекистонда ишлаб чиқарилишини тасаввур қилиш қийин бўлган специфик техникаларнинг экспорти ҳам давом этмоқда.