Статагентлик Chery автомобилларини Ўзбекистонда ишлаб чиқарилган автомобиллар қаторига қўшган Сентябрь ойи саноат статистикасида 7 335 дона Chery автомобили Ўзбекистонда ишлаб чиқарилган автомобиллар сифатида кўрсатилган. Қизиқ тарафи, 2022 йил тегишли даври статистикасига ҳам 316 дона Chery қўшилган. Ўтган йили ҳам, шу йил сентябргача ҳам статагентлик ўз ҳисоботларига Chery'ни киритмаганди. Шу билан бирга ушбу автомобиллар Chery брендининг айнан қайси модделлари экани ноаниқ. Хитойнинг Chery Automobile компаниясида ишлаб чиқарилган Tiggo кроссовери ва Arrizo седанлари ўтган йилдан бошлаб Ўзбекистонга импорт қилиб келиниб, сотувлар бошланганди. Маълумот учун, Ўзбекистонда худди Chery каби Kia, Exeed, BYD каби брендларга тегишли автомобиллар ҳам импорт қилиниб ёки SKD типида йиғилиб сотилади. Қизиқ тарафи, статагентлик ҳисоботдан Nexia Т-250 моделини чиқариб ташлаган, ваҳоланки 2023 йилда 2 133 дона Nexia Т-250 олдинги ойларда ҳисоботга қўшиб бўлинганди. Умуман олганда, автомобиль ишлаб чиқариш яна қисқаришни бошлаган, Сентябрда жами 34 400 дона енгил автомобиль ишлаб чиқарилган, бу августдагига нисбатан 4 828 дона кам.