​Монополист UZAUTOMOTORS автомобиль ишлаб чиқаришни 41,2%га камайтирган. Буни аниқлаш учун ўчирилган маълумотларни топишга тўғри келади Давлат статистика қўмитаси маълумотларига таянилса, 2021 йилнинг январь-март ойларида 44 454 дона автомобиль ишлаб чиқарган. Қўмита ўтган йилнинг тегишли даври маълумотларини келтирмаган. Қўшимчасига айтиш жоизки, автомобиль ишлаб чиқариш бўйича ўтган йилнинг тегишли даври статистикаси ўчириб юборилган ҳам. Саҳифага ўтсангиз биз-у сизга таниш бўлиб бораётган 404 Article not found ёзувига дуч келасиз. Автомобиль ишлаб чиқариш билан боғлиқ статистикага оид бошқа бир саҳифада эса бутунлай ўзгача маълумотларга дуч келасиз. Нега ўтган йилнинг январь-март ойларида автомобиль ишлаб чиқариш статистикаси ўчириб юборилади, ахир нима учун дейишингиз мумкин. Билмадим. Биласиз, маълумотларни саҳифадан ўчириб юбориш мумкин, лекин тармоқдан йўқ қилиб бўлмайди. Сақланиб қолинган маълумотларга суянилса, 2020 йил январь-март ойларида 75 635 дона автомобиль ишлаб чиқарилгани маълум бўлади. Бошқача айтганда, автомобиль ишлаб чиқариш ўтган йилнинг шу даврига нисбатан 41,2%га камайган. Хусусан, сонда энг катта камайиш Nexia T-250 билан содир бўлган, 13763 автомобиль кам ишлаб чиқарилган. Фоизда ҳисоблаганда, бу Spark билан боғлиқ, ишлаб чиқариш 78,2%га қисқарган. Балки шунинг учун ҳам ўтган маълумотлар қўмита саҳифасидан йўқ бўлиб қолгандир. Гумон иймондан айиради, балки техник сабаб билан маълумот ўчиб кетгандир. Ўтган ёмон замонда агар қайсидир жорий статистика салбий бўлиб қолса, тегишлича ўтган даврдагиси йўқ қилинарди ёки ўсиш кўрсаткичи ясаш учун қайта ишланарди. UZAUTOMOTORS автомашиналари бир ойлик танаффусдан кейин автосалонлардан тўсатдан йўқ бўлиб қолгани, шартнома бўйича автомобиль етказиб бериш 6-9 ойгача белгиланаётгани сабабини энди тушунгандирсиз. Бизнес модель бўйича автомобиль ишлаб чиқаришни кўпайтиргандан кўра, камайиштириш ва бошқариладиган дефицит яратиш "фойдали" экани тушуниб етилган кўринади. Ўтган ёмон замонга қайтдикми ёки айланиб етиб келдикми, ҳозирча бир нима дейиш қийин. @the_bankiroff