Uzbekistan Airways трансформацияси бошланганидан хурсандман Ниҳоят “Uzbekistan airways” трансформацияси бошланмоқда ва хурсанд қиладигани бунда асосий эътибор иқтисодий самарадорликни яратишга қаратилмоқда. Келинг, эслайлик, яқин-яқинларгача биз қандай миллий авиакомпанияга эга эдик? Uzbekistan Airways самарасизлигининг ибтидоси ва пул ўзлаштириш бизнес-модели энг қиммат самолетларни энг серхаражат схемалар бўйича сотиб олиш устига қурилганидан бошланарди. Қанча кўп қиммат самолет сотиб олинса ва бунга қанча кўп маблағ сарфланса шунча яхши эди. Авиачипталар қимматлиги, зарар келтирувчи узоқ рейсларни кўпайтирилиб, маҳаллий рейсларнинг мақсадли тарзда йўқотилганлиги бунинг оқибатларидир. Бутун бизнес модел давлат манбаларидан максимал даражада кўпроқ пул ундиришга қаратилган бўлган. Яъни авиакомпания қанча кўп зарар кўрса, давлат шунча кўп пул бериб келган. Бошқача айтганда, Uzbekistan Airways учун зарар кўриб ишлаш ўта фойдали ҳисобланган. Таргет харажатларни минималлаштириш эмас, харажатларни максималлаштириш этиб белгиланган: Самолетлар сотиб олишдан, рейслар локацияси, хизмат кўрсатиш ва авиабензин сотиб олишгача. Париж, Рим ва Миланга рейслар нега қўйилган? Ҳукумат аъзолари ва номаълум оталарнинг бойвуччалари ва эркатойлари ҳар ҳафта шоппинг қилиши учун. Париж, Милан ва Римда нега ваколатхоналар очилган? Ҳукумат аъзолари ва номаълум оталарнинг фарзандлари, севимлилари озод ва тўқ Европада иш билан таъминланишлари учун. Билет сотиш агентликлари нега потирлатиб очилган ва атайин ўта қиммат комиссиялар белгиланган? Албатта, пул ўзлаштириш ва хориждаги воситачиларга маржани кўчириш учун. Очиқланаётган тадбирларга қараганда энди буларнинг барчаси тарихда қолади. Лекин рўйхатда қиммат самолетларни энг қиммат схемалар бўйича сотиб олишни тўхтатиш чораларини кўрмадим. Балки бордир, кейинроқ очиқлашар. Ҳа, трансформациядан аввал компаниянинг молиявий ҳисоботларини эълон қилишса ҳам ёмон бўлмасди. Тубнинг бошини, йиллар давомида бўйнимизга илиб келганимиз зарарларнинг миқёсини билиб олсак, фақат кейинги фойдамизга, ўзгаришлар тренди учун ишлайди.