​Ҳавошканинг бозор нархи ошиши осмонимиз очилиши ва ҳукуматнинг маъмурий аралашуви чекланишига ҳам боғлиқ Кечаги катта йиғилишда Uzbekistan Airways бозор қийматини 1,6 миллиард доллардан 2,3 миллиард долларгача ошириш имкони мавжудлиги таъкидланган. Ростанам, агар инвесторлар кўзи билан қаралса, UzNIF портфелидаги номиналига нисбатан энг катта реал қийматга ва жозибага эга актив айнан Uzbekistan Airways. Ҳавошкамизнинг росмана тижорий компанияга айланиши учун нафақат операцион трансформация, бозорни очиш бўйича сиёсий ирода ва маъмурий аралашувларни чеклаш хоҳишлари ҳам керак. Ўзбекистон осмонини очишдан ўрта ва узоқ истиқболда энг кўп ютадиган айнан Uzbekistan Airways бўлишини қарор қабул қилувчилар тушуниб етиш керак. Ҳавошка ўзининг шиорида айтилганидек, Марказий Осиёнинг асосий қанотига айланиши мумкин, агар компания бизнес моделини тўғри танлай олса. Бу бизнес модел қанақадир чўнтак компанияларга анъанавий канал ва буюртмаларини қўш—қўллаб топшириш эмас, бу бизнес модел қимматлаштирилган ёқилғидан фойдаланиш эмас, бу бизнес модел мижозларни иккиламчи кўриб, ҳукумат аъзолари ва уларнинг қариндошларига устувор хизмат кўрсатиш эмас, бу бизнес модел аэропортлар қуриб, текинга ҳукуматга топшириш эмас, бу бизнес модел авиакомпанияга хос бўлмаган ижтимоий вазифаларни бажариш эмас. Яна бу бизнес модел лоукостерларни ўзига рақобатчи кўриш ҳам эмас, яна бу бизнес модел асосий рақобатчилардан паритетларни талаб қилишни ҳам назарда тутмаслиги керак. Ҳавошканинг мижозлари ўртадан юқори даромад эгалари ва доимий учувчилар, сифатни, комфортни ва эътиборни талаб қилувчилар — ва улар Марказий Осиё бўйлаб 10 миллиондан кам эмас (ҳозирча сўкиб-сўкиб, ҳавошкада учувчилар). Ҳаммаси тўғри қилинса, ҳавошканинг мижозлари бир кун келиб ундан қувонишни ва фахрланишни бошлашади. Худди Turkish, Qatar ва Emirates мижозлари каби.