1 майга қадар автомобиль харидидаги навбатлар йўқоладими? 8 кундан кейин, Давлат раҳбарининг автомобиль харидидаги навбатларни тўлиқ бартараф этиш тўғрисидаги топшириғи ижро этилиши керак. Жонкуяр Қурбонов ҳозирдан ташвишга тушаяпти: октябргача чўзилаётган шунча навбат қандай сўрилиб кетади? Расмий статистика бўйича 2022 йилнинг 3 ойида 68 905 дона автомобиль ишлаб чиқарилган, бу 2021 йил кўрсаткичидан 24 451 дона кўп (айнан ўтган йили талабнинг қондирилмагани навбатлар муаммосини кучайтирганди). Лекин бу автомобиль сотиб олишда узун навбатлар кузатилмаган пандемиягача бўлган кўрсаткичдан 6 530 дона кам. Демак, ҳозирги кўрсаткичлар етарли эмас. Бекорга Давлат раҳбари биринчи ярим йилликда камида 160 мингта автомобиль ишлаб чиқариш лозимлигини таъкидламаган эди. Навбатлар сўрилиб кетиши учун программа минимумга етиб бориш керак. Шунингдек, автомобиллар экспортини тўхтатиб, кўпроқ ички бозорга йўналтириб, бутловчи қисмлар ҳисобига йиллик экспортни 500 миллион долларга етказишга кўрсатма берилган эди. Бу вазифа ҳам ҳозирча савол остида. Статистика кўрстаяптики, автомобиллар экспорти давом этмоқда. Йиллар давомида фақат Ўзавтомоторснинг кафолатланган буюртмаси учун ишлаган, рақобатга бардошсиз маҳаллийлаштириш ботқоғидаги корхоналарни экспортга йўналтириш осон иш эмас.