Саноат ишлаб чиқаришнинг физик ҳажми 5,7%га ўсган, лекин айрим салбий сигналлар бор Бир қарашда саноат ишлаб чиқариш суръатига уруш оқибатлари таъсир кўрсатмаган (одатда, кризисли вазиятнинг ишлаб чиқариш цикли узунроқ бўлган саноатга таъсири анча кечикиб акс этади, лекин узоқроқ давом этади). Ўтган йилнинг шу давридаги 3,8%лик ўсишга нисбатан 5,7%лик ўсиш, албатта яхши кўрсаткич. Лекин салбий тенденнциялар бошлангани хавотирга солмаслиги мумкинмас. 2021 йилда узоқ вақтли давомли пасайишдан кейин нефть ва газ қазиб олиш яна ўсишни бошлаган эди. 2022 йилнинг 1- чорагида нефть, табиий газ ва конденсат ишлаб чиқаришда яна ортга кетиш бошланганини эътиборсиз қолдириш қийин. Бу блэкаутнинг оқибатлари билан боғлиқми, ё қайтадан бошланган пасаювчи циклми, бир нарса дейиш қийин. Хурсанд қиладигани, электр энергияси ишлаб чиқариш барқарор ўсишда давом этаяпти. Суръат тушгани йўқ. Лекин газ қазиб олиш пасайишда давом этса, электр генерациясида ҳам ўсиш тўхтаб қолиши мумкин. Муҳим саноат товарларидан яна дизель ёқилғиси, бензин, цемент, ўсимлик ёғи, ун ишлаб чиқариш ҳам қисқаришни бошлаган. Дизель ёқилғиси, бензин, цемент ишлаб чиқариш қисқариши қувватлар етишмовчилиги эмас, талаб қисқариши билан боғлиқ тарзда юз бераётган бўлса, бу тез орада бошқа секторларда ҳам қисқаришлар бошланишидан дарак бўлиши мумкин.