Россия Марказий банки валюта интервенцияларини каррасига оширмоқчи. Лекин бу рублга ёрдам бермайди Келаси ҳафтадан бошлаб Россия Марказий банки кунлик валюта интервенцияларни қарийб 10 баробарга 21,4 млрд.рубль эквивалентигача оширмоқчи. 22 сентябргача давом этадиган мақсадли интервенцияларнинг умумий ҳажми 150 млрд рубль ёки 1,5 млрд доллар атрофида бўлади. Россия Марказий банки ихтиёрида бўш доллар қолмаган, шунинг учун интервенциялар юанни сотиш орқали амалга оширилади. 16 сентябрь куни Россиянинг 3 млрд.долларлик еврооблигациялари сўндирилиши лозим. Инвесторларнинг катта қисми ўз қайтган маблағларини валютага айлантиришлари табиий. Марказий банкнинг интервенциялари шу талабнинг ярмини қоплайди холос (инвесторлар Россия ичида рублни юанга, бошқа глобал платформаларда эса юанни долларга алмаштира оладилар). Россия Марказий банки рубль курси барқарор қолиши учун шу етарли бўлади ҳисобламоқда. Лекин бозор иштирокчиларида олдиндан очиқланган интервенциялар таъсирига ишонч йўқ. Эрталабдан доллар курси 98,60 рублдан ошди. Онлайн платформаларда доллар 101 рублга етди. Экспертлар долларнинг рублга нисбатан курси 20-25 сентябрларга қадар ўта ўзгарувчан бўлишини прогноз қилишмоқда.