Ишоралар Пул-кредит сиёсатининг асосий йўналишлари тезислари ва бугунги анжуманда янграган фикрлардан қатор ишораларни илғаш мумкин. Фискал консолидация яқин истиқбол реалликлари эмас. Ҳали анча-мунча вақт улкан бюджет дефицити ва бюджет интизомсизлиги шароитида яшашда давом этамиз. Яхши хабар шуки, регулятор буни инобатга олмоқда ва ҳисоб-прогнозларга қўшган. Ташқи савдо дефицити кенгайиб бориши хавотирли, лекин критик даражада эмас. Салбий сальдо ташқи конъюнктура яхшиланиши билан бирламчи ва иккиламчи даромадлар ва инвестицион оқим ҳисобидан қопланиб кетишига умидлар йўқолмаган. Миллий валюта курсига босимлар юмшагани йўқ. Захиралар нейтраллиги масаласида 2018 йил чизиғидан ортга чекиниш бўлмайди. Микроқарзлар лимити 100 млн.сўмгача оширилади. Тўғри, қарз юки ошиши хавотирлари фонида узвий бўлмаган қадам. Балки бу сиёсий, балки аллақачон Марказий банкдан ташқарида қабул қилинган қарор. Автокредитлар ажратишда микроқарзлар комбинациясидан фойдаланаётган банкларга нисбатан янги пруденциал назорат ўргатилиши мумкин. Автокредитларга "ўтириб" қолган, регулятор талабларини микроқарзлар орқали четлаб ўтаётган айрим банклар намойишкорона жазоланишигина вазиятни ўнглаши мумкин. Ҳозирча "ёмон бузоқлар" билганини қилаяпти. Валюта айирбошлаш функцияси фақат банклар илкида бўлади. "Кўча"га бу функция тақдим этилишини кутмаслик керак. Қарор қатъий.