Бюджет тақчиллиги яна ошиб ЯИМга нисбатан 4 фоизга етиши мумкин Регулятор тақдим этган Банк тизими ликвидлиги шарҳига кўра, йилнинг II ярмида бюджет харажатларининг кутилаётган ортиши (умумий фискал тақчилликнинг ЯИМга нисбатан 4 фоиз атрофида) ҳамда ички валюта бозорида талаб ва таклифнинг шаклланиши бўйича кутилмалардан келиб чиқиб банк тизими умумий ликвидлигининг ортиб бориши прогноз қилинмоқда. 2022 йил бюджети тақчиллигининг чекланган миқдори ялпи ички маҳсулотнинг 3 фоизи миқдорида белгиланган. Қонун бўйича бюджет тақчиллиги чекланган миқдорининг ошиб кетишига олиб келиши мумкин бўлган қўшимча харажатлар фақат қўшимча даромад манбаи мавжуд бўлганда ёки бошқа харажатларни қисқартириш ҳисобига амалга оширилиши кўрсатилган. Баҳорда, кризисга қарши чоралар муҳокамаси вақтида бюджет тақчиллиги сақлаб қолиниши, бюджет харажатлари оширилмаслиги эълон қилинган эди. Ўзи сайловлар, референдумлар, муҳим сиёсий тадбирлар ўтадиган йилларда бюджет харажатлари ошиб борса ошадики, асло камаймайди, белгиланган фискал қоидалар ва интизомсизликка кўз юмиб турилади. Ликвидлик мавзусига қайтамиз. Ўтган ярим йилликнинг иккинчи чораги юқори ликвидлик фонида кечган. Ҳукумат харажатларининг ошиши ҳам, қимматли металлар хариди ҳам ликвидликни оширувчи омилларга айланган. Йилнинг қолган даврида ҳам Марказий банк умумий ликвидликни юқори даражада сақланишини прогноз қилган ҳолда, асосий эътибор ликвидликни самарали бошқариш орқали инфляцияга босим яратиши мумкин бўлган монетар омиллар таъсирини минималлаштиришга қаратилишини билдирмоқда.