Янги вазир хусусий университетлар очишга "тақиқ"ни бекор қиладими? Хусусий университетлар учун лицензия бериш 9 ойдан бери оғзаки топшириқ асосида тўхтаб қолган. Бугунга келиб хусусий университет очиш ҳаракатидаги юздан зиёд инвесторлар нима қилишини билмайди. Ер, бино, ускуналарга миллионлаб доллар пул тикилган. Олимлар, профессорлар, тадқиқотчилар чақирилган. Энг қизиғи, маъмурий тарзда лицензия бериш тўхтатилгандан кейин лицензиянинг қора бозори пайдо бўлган. 2022 йилда берилган лицензияларнинг нархи бир неча миллион долларга чиққан. Бир гуруҳ амалдорлар ва уларнинг эҳтимолий шериклари лицензия беришни тўхтатиб қўйиш орқали миллионлаб доллар ишлаб олиш учун атайин шундай қилишган, дейиш фикридан йироқман, лекин оқибат шуки, бугун хусусий университет очиш учун ягона йўл — қонун қоидаларни бузиб, кимларнингдир коррупцион ҳаракатларига шерик бўлиш орқали ўтадиган бўлиб қолган. Бу ҳақда Давлат раҳбарига тегишли ахборот етказилганми ё йўқ, билмайман. Лекин росмана умид қиламанки, Администрациядан Олий таълим, фан ва инновациялар вазири лавозимига ўтказилиши кутилаётган Одил Абдураҳмонов тизимдаги фаоллигини сунъий равишда ташкил этилган бу зараркунандаликни тугатишдан бошлайди.