Таълимда адолат: Лицензия бериш ва уни назорат қилишни бетараф идорага юклатиш таклиф қилинди Президентнинг тадбиркорлар билан Очиқ мулоқотига тайёргарлик кўриш доирасида анчадан буён турли соҳаларда тадбиркорлар билан очиқ мулоқот ўтказилиб келиняпти. Мана кеча хусусий таълим соҳасидаги тадбиркорлар билан учрашув ташкиллаштирилган. Ўтказилинаётган очиқ мулоқотлар четдан қараганда бизга кўринмайдиган муаммолар талайгина эканини кўрсатмоқда. Хусусан, IDU халқаро рақамли университет асосчиси кўтарган таклиф жуда ўринли деб ҳисоблайман. У таълим соҳасида лицензия бериш ва уни назорат қилиш вазифаси бетараф идорага юклатилиши таклифини илгари сурмоқда. Бетарафлик ҳамиша адолат рамзи. Айниқса, таълимда лицензия бериш қайсидир маънода келажакни белгилайди. Муносиб номзодларгагина лицензия берилиши керак. Бу учун эса ўзининг мактаблари, университетлари йўқ идора мазкур иш билан шуғулланиши лозим. Шу ўринда лицензия бериш бетараф идорада эмаслиги туфайли 1,5 йилдан бери хусусий университетларга лицензия бериш оғзаки тартибда тўхтатиб қўйилганини эслаб кетмаслик мумкин эмас. Тадбиркор кўтарган бу таклиф ўз натижасини беришини кутамиз.